ភេសជ្ជៈល្អបំផុត និងគួរជៀសវាងមុនពេលចូលគេង ដែលអ្នកជំនាញណែនាំ

មនុស្សជាច្រើនតែងជួបបញ្ហាពិបាកគេង ឬភ្ញាក់កណ្ដាលយប់ ហើយជ្រើសរើសការញ៉ាំភេសជ្ជៈផ្សេងៗដោយសង្ឃឹមថា អាចជួយឱ្យគេងលក់ស្រួល។ ប៉ុន្តែ តើភេសជ្ជៈណាខ្លះពិតជាជួយដល់ដំណេក ហើយភេសជ្ជៈណាខ្លះបែរជាបំផ្លាញការគេងដោយមិនដឹងខ្លួន?

យោងតាមលោកវេជ្ជបណ្ឌិត Alon Avidan នាយកមជ្ឈមណ្ឌលជំងឺ នៃការគេង នៃសាកលវិទ្យាល័យ UCLA សហរដ្ឋអាមេរិក បានបញ្ជាក់ថា គោលការណ៍សំខាន់បំផុតគឺ មិនត្រូវញ៉ាំជាតិទឹកច្រើនពេកមុនពេលចូលគេងនោះឡើយ ព្រោះវានឹងធ្វើឱ្យអ្នកភ្ញាក់នោមញឹកញាប់នៅពេលយប់ ជាពិសេសមនុស្សចាស់ អ្នកដែលមានបញ្ហាប្លោកនោម ឬអ្នកកំពុងប្រើថ្នាំបញ្ចុះជាតិស្ករ/បញ្ចុះទឹកនោម។ អ្នកជំនាញណែនាំឱ្យកាត់បន្ថយការផឹកទឹក ៣ ទៅ ៤ ម៉ោងមុនពេលចូលគេង ដោយគ្រាន់តែក្រេបបន្តិចបន្តួចដើម្បីបំបាត់ការស្រេកទឹកបានហើយ។

ខាងក្រោមនេះជាការចាត់ថ្នាក់ភេសជ្ជៈល្អបំផុត អាក្រក់បំផុត មុនពេលចូលគេង៖

១. ក្រុមភេសជ្ជៈល្អបំផុតសម្រាប់ដំណេក

ទឹកធម្មតា (Plain Water)៖ ជាជម្រើសល្អបំផុតសម្រាប់សុខភាព មិនផ្ដល់កាឡូរី និងជួយការពាររាងកាយពីការខ្សោះជាតិទឹក។ កង្វះជាតិទឹកអាចបណ្ដាលឱ្យស្ពឹកស្រពន់ ខួរក្បាលគិតមិនសូវចេញ ប្រឈមនឹងការទល់លាមក និងគ្រួសក្នុងតម្រងនោម។ ទោះជាយ៉ាងណា គួរញ៉ាំត្រឹមតែមួយកែវល្មម ឬពីរបីក្អឹក ជៀសវាងការភ្ញាក់នោមរំខានដំណេក។

តែផ្កាចំរុះ/តែផ្កាខាម៉ូម៉ាល (Chamomile Tea)៖ ក្លិន និងសារធាតុ sedative ពីស្រទាប់ផ្កា chamomile ជួយបន្ថយភាពតានតឹង កាត់បន្ថយការថប់បារម្ភ និងជួយឱ្យអារម្មណ៍ស្ងប់ស្ងាត់ងាយនឹងងងុយគេង (ចំណាំ៖ ស្ត្រីមានផ្ទៃពោះ ឬបំបៅដោះកូន គួរពិគ្រោះជាមួយគ្រូពេទ្យជាមុន)។

ទឹកផ្លែឆឺរីជូរ (Tart Cherry Juice)៖ ផ្លែ Tart Cherry សម្បូរទៅដោយអ័រម៉ូន «មេឡាតូនីន» (Melatonin) ធម្មជាតិ ដែលជាអ័រម៉ូនជំនួយដល់ការគេង។ ការសិក្សាបានបង្ហាញថា វាជួយកាត់បន្ថយរយៈពេលពិបាកគេង និងកាត់បន្ថយការភ្ញាក់កណ្ដាលយប់។ ទោះជាយ៉ាងណា ដោយសារទឹកផ្លែឈើមានជាតិស្ករធម្មជាតិខ្ពស់ អ្នកជំនាញណែនាំឱ្យញ៉ាំផ្លែស្រស់វិញ ឬញ៉ាំក្នុងបរិមាណតិចតួច ដើម្បីកុំឱ្យជាតិស្ករទាញជាតិទឹកធ្វើឱ្យនោមញឹក។

២. ក្រុមភេសជ្ជៈគួរជៀសវាងមុនពេលគេង

គ្រឿងស្រវឹង (Alcohol)៖ មនុស្សជាច្រើនយល់ច្រឡំថាការផឹកស្រាជួយឱ្យងងុយគេង ប៉ុន្តែការពិតជាតិអាល់កុលបំផ្លាញរលកខួរក្បាលសំខាន់ៗពេលគេង និងរារាំងមិនឱ្យរាងកាយឈានដល់ដំណាក់កាលគេងលក់ស្កប់ស្កល់ (Deep Sleep) នោះឡើយ។ អ្នកជំនាញណែនាំឱ្យឈប់ផឹកគ្រឿងស្រវឹងយ៉ាងហោចណាស់ ៤ ម៉ោងមុនពេលចូលគេង។

កាហ្វេ (Coffee)៖ ជាតិកាហ្វេអ៊ីន (Caffeine) ធ្វើឱ្យខួរក្បាលភ្ញាក់ និងបញ្ចុះទឹកនោម។ ជាតិកាហ្វេអ៊ីនត្រូវការពេលរហូតដល់ ៨ ម៉ោងដើម្បីរលាយអស់ពីខ្លួន ដូច្នេះគួរជៀសវាងកាហ្វេ ៨ ម៉ោងមុនពេលចូលគេង (សូម្បីតែកាហ្វេប្រភេទ Decaf ក៏នៅតែមានកាហ្វេអ៊ីនតិចតួចដែលអាចរំខានដែរ)។

តែខ្មៅ និងតែបៃតង (Black & Green Tea)៖ តែទាំងពីរប្រភេទនេះសុទ្ធតែមានជាតិកាហ្វេអ៊ីន និងមានប្រសិទ្ធភាពបញ្ចុះទឹកនោមស្រាល។ គួរជៀសវាងការញ៉ាំតែទាំងនេះយ៉ាងហោចណាស់ពី ៤ ទៅ ៦ ម៉ោងមុនពេលចូលគេង។

ភេសជ្ជៈមានជាតិហ្គាស (Soda)៖ ក្រៅពីមានជាតិកាហ្វេអ៊ីន និងជាតិស្ករខ្ពស់ដែលធ្វើឱ្យរំខានដំណេក ពពុះហ្គាសនៅក្នុងភេសជ្ជៈប្រភេទនេះងាយបង្កឱ្យមានអាការៈហើមពោះ ឆ្អល់ និងមានខ្យល់ក្នុងក្រពះ ដែលរំខានដល់ការគេង។ គួរជៀសវាងផឹកភេសជ្ជៈមានហ្គាស ៣ ទៅ ៤ ម៉ោងមុនគេង (និង ៨ ម៉ោង ប្រសិនបើភេសជ្ជៈនោះមានជាតិកាហ្វេអ៊ីន)។

ដូច្នេះប្រសិនបើអ្នកមានអារម្មណ៍ស្រេកទឹកមុនពេលចូលគេង ជម្រើសដ៏ល្អ និងមានសុវត្ថិភាពបំផុតគឺ ទឹកធម្មតាមួយកែវល្មម។ ផ្ទុយទៅវិញ គួរជៀសវាងដាច់ខាតនូវកាហ្វេ តែ ភេសជ្ជៈមានជាតិហ្គាស និងគ្រឿងស្រវឹង ដើម្បីធានាថាអ្នកអាចគេងលក់ស្កប់ស្កល់ពេញមួយយប់ និងភ្ញាក់ឡើងប្រកបដោយថាមពល៕