តើ DeepSeek អាចធ្វើឱ្យឧស្សាហកម្ម បញ្ញាសិប្បនិម្មិត (AI) ផ្លាស់ប្ដូរយ៉ាងដូចម្ដេច?

តើក្រុមហ៊ុនចិន DeepSeek បានបង្កើតវិធីសាស្ត្រថ្មីក្នុងការអភិវឌ្ឍន៍ គម្រូ AI ដែលមានប្រសិទ្ធភាព សន្សំសម្ចៃថាមពល និងងាយស្រួលប្រើប្រាស់មែនទេ? នេះជាអ្វីដែលអ្នកបណ្ដាក់ទុនក្នុងវិស័យបច្ចេកវិទ្យាដ៏មានឥទ្ធិពល លោក Marc Andreessen បានលើកឡើង និងសាទរ Deepseek ថា ជា របកគំហើញដ៏អស្ចារ្យ និងគួរឱ្យចាប់អារម្មណ៍បំផុត ដែលលោកធ្លាប់បានឃើញ និងជាប្រភពបើកចំហរ (Open-Source) ដែលជាអំណោយដ៏ពិសេសសម្រាប់ពិភពលោក។ ប៉ុន្តែ តើ AI ប្រភពបើកចំហជាអ្វី? ហើយហេតុអ្វីបានជា វាមានសារៈសំខាន់?

ហេតុអ្វីបានជា DeepSeek ខុសពីបច្ចេកវិទ្យា AI ផ្សេងទៀត?

ដោយផ្អែកលើចំណងជើងព័ត៌មានក្នុងរយៈពេលប៉ុន្មានសប្ដាហ៍កន្លងមកនេះ DeepSeek បានធ្វើឱ្យមានការរង្គោះរង្គើវិស័យបច្ចេកវិទ្យា។ មានមូលដ្ឋាននៅទីក្រុង Hangzhou និងទទួលបានកញ្ចប់ទឹកប្រាក់ទ្រទ្រង់ការពារហានិភ័យរបស់ប្រទេសចិន High Flyer ក្រុមហ៊ុន DeepSeek ត្រូវបានបង្កើតឡើងក្នុងឆ្នាំ២០២៣។ AI ម៉ូឌែល DeepSeek-R1 គឺជាផលិតផលដំបូងរបស់ DeepSeek និងទទួលភាពល្បីល្បាញជាខ្លាំង បន្ទាប់ពីបានដាក់ដំណើរការក្នុងខែមករា ឆ្នាំ២០២៥ ដោយសារមានសមត្ថភាពបកស្រាយ និងឆ្លើយសំណួរប្រកបដោយហេតុផល និងដោះស្រាយលំហាត់គណិតវិទ្យាល្អ ដែលអាចប្រកួតប្រជែងជាមួយ បច្ចេកវិទ្យា AI ដទៃទៀត បានដោយងាយ។ ប៉ុន្តែ របៀបនៃការអភិវឌ្ឍបច្ចេកវិទ្យានេះ មានចំណុចគន្លឹះមួយចំនួន ដែលខុសពីបច្ចេកវិទ្យា AI ដទៃទៀត។

ខុសពី ChatGPT របស់ OpenAI និង បច្ចេកវិទ្យា AI ដទៃទៀត គម្រូ សំណុំទិន្នន័យ និងក្បួនដោះស្រាយបញ្ហា ត្រូវបានលាក់ជាសម្ងាត់។ បច្ចេកវិទ្យា DeepSeek គឺបើកចំហរគ្រប់យ៉ាង មានន័យថា អ្នកណាក៏អាចទាញយក កូពី និងបង្កើតបច្ចេកវិទ្យានេះ ប្រើបានដែរ។ កូដ និងការពន្យល់បានទូលំទូលាយរបស់វា អាចចែករំលែកបានដោយសេរី ដែលអនុញ្ញាតឱ្យអ្នកអភិវឌ្ឍកម្មវិធី និងស្ថាប័នផ្សេងៗ អាចចូលប្រើ កែប្រែ និងអនុវត្តបានជាសកល។

ផ្ទុយទៅវិញ ទោះជាម៉ូឌែល AI របស់ Meta និង Google ក៏មិនទាន់បើកបង្ហាញសំណុំទិន្នន័យបង្វឹក AI បង្ហាញជាសាធារណៈនោះដែរ។

ថោកជាង និងសន្សំសំចៃថាមពលជាង

ភាពខុសគ្នាសំខាន់មួយទៀតរបស់ DeepSeek គឺថ្លៃដើមនៃការផលិតកម្មវិធីនេះ។ ទិន្នន័យមួយចំនួន បង្ហាញថា បច្ចេកវិទ្យានេះ ត្រូវបានផលិតឡើងក្នុងតម្លៃ ៥,៦លានដុល្លារ បើគិតជាភាគរយ ត្រឹមតែ១០ភាគរយ នៃការចំណាយរបស់ Meta’s Llama ប៉ុណ្ណោះ។ ការចំណាយនេះ បានធ្វើឱ្យមានការចោទជាសំណួរថា តើការចំណាយទឹកប្រាក់ដ៏ច្រើនសម្បើម ជុំវិញទីផ្សារ AI ជាពិសេសនៅអាមេរិក ពិតជាចាំបាច់ ដូចពីដំបូងដែរឬទេ? ខណៈភាគហ៊ុន Nvidia ដែលជាក្រុមហ៊ុនឌីហ្សាញបច្ចេកវិទ្យា Semiconductor ដែលជាប្រភពផ្ដល់ថាមពលដល់បច្ចេកវិទ្យា AI បានធ្លាក់ចុះយ៉ាងខ្លាំង កាលពីចុងខែមករា។

ប្រសិនបើ AI ត្រូវការថាមពលតិច ក្នុងការរៀបចំ នេះជាដឹណឹងល្អសម្រាប់បរិស្ថាន ព្រោះការប្រើប្រាស់អគ្គិសនីខ្ពស់ជំវិញការដំឡើង AI កំពុងជំរុញការបញ្ចេញកាបូនយ៉ាងខ្លាំង។ វិធីសាស្ត្ររបស់ DeepSeek អាចផ្ដល់នូវផ្លូវឆ្ពោះទៅរក ការដំឡើង AI ដែលមាននិរន្តរភាពជាងមុន។

តើ AI ប្រភពបើកចំហ (Open-source AI) អាចផ្លាស់ប្ដូរទីផ្សារបានយ៉ាងដូចម្ដេច?

នៅចុងខែមករា ឆ្នាំ២០២៥ DeepSeek បានវ៉ាដាច់ ChatGPT ជាកម្មវិធីឥតគិតថ្លៃដែលត្រូវបានទាញយកច្រើនបំផុតនៅលើ Apple App Store នៅសហរដ្ឋអាមេរិក។ មនុស្សជាច្រើនជឿថាការកើនឡើងយ៉ាងឆាប់រហ័សរបស់វាអាចជាជំហានដ៏សំខាន់មួយក្នុងការធ្វើប្រជាធិបតេយ្យ AI ដែលអនុញ្ញាតឱ្យក្រុមហ៊ុនតូចៗ ការចាប់ផ្តើមអាជីវកម្ម និងអ្នកអភិវឌ្ឍន៍ម្នាក់ៗបង្កើតនៅលើ DeepSeek-R1 ។

វិធីសាស្រ្ត AI សម្រាប់ទាំងអស់គ្នា (AI-for-all) ប្រកបដោយសមភាពជាងមុន អាចបង្កើនល្បឿនការបង្កើតថ្មីនៅក្នុងតំបន់ជាច្រើន ដែលមានការចូលប្រើប្រាស់បច្ចេកវិទ្យាទំនើបៗមានកម្រិត និងជំរុញភាពរីកចម្រើននៃបច្ចេកវិទ្យាកាន់តែទូលំទូលាយ៕