បន្លែសុវត្ថិភាពដាំដុះតាមសាលារៀន​ផ្តើម​ប្រមូលផល ដើម្បីគាំទ្រ​ដល់កងទ័ពជួរមុខ និង​ជនភៀសសឹក

ចលនាដាំដុះបន្លែសុវត្ថិភាព ដែលជាការផ្ដួចផ្ដើមបំផុសដោយលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការសមាគមកាយឫទ្ធិនារីកម្ពុជា បានចាប់ផ្ដើមប្រមូលផលជាបណ្ដើរៗហើយនៅតាមសាលារៀន និងតាមសហគមន៍នានា ដើម្បីយកទៅផ្ដល់ជូនដល់វីរកងទ័ពនៅសមភូមិមុខ វីរនគរបាលជាតិ និងប្រជាពលរដ្ឋដែលកំពុងភៀសសឹកនៅតាមជំរំសុវត្ថិភាព។

ចលនា “យើងរួមគ្នាដើម្បីជាតិ” គឺជា​ចលនាបំផុសសកម្មភាពដាំបន្លែ ដែលអាច​ឆាប់ប្រមូលផល​នៅតាមសាលារៀន ផ្ទះសម្បែង វត្តអារាម និង​ដីសហគមន៍ សំដៅកសាង​កសិផលជាតិ ដើម្បីទ្រទ្រង់​ដល់វីរកងទ័ព វីរនគរបាលជួមុខ​ការពារព្រំដែន និង​ជនភៀសសឹក​ដោយសារ​ការឈ្លានពីសំណាក់យោធាថៃ។

ក្នុងឱកាសជួបសំណេះសំណាលជាមួយលោកគ្រូ អ្នកគ្រូ និងសិស្សានុសិស្ស ព្រមទាំងចូលរួមប្រមូលផលបន្លែក្នុងចលនា “យើងរួមគ្នាដើម្បីជាតិ!” នៅសាលាបឋមសិក្សាភ្នំពេញថ្មី កាលពីថ្ងៃអាទិត្យ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានមានប្រសាសន៍ដោយ​បង្ហាញនូវមោទនភាព និងក្តីរំភើបយ៉ាងក្រៃលែង ចំពោះចលនាដាំបន្លែដែលត្រូវបានធ្វើឡើងនៅទូទាំងប្រទេស ក្រោមស្មារតីស្នេហាជាតិ និងសាមគ្គីភាពខ្មែរតែមួយ។ លោកជំទាវបណ្ឌិត ក៏បានថ្លែងអំណរព្រះគុណដល់ព្រះសង្ឃ និងអរគុណដល់អាជ្ញាធររាជធានី-ខេត្ត សាលារៀន វត្តអារាម សហគមន៍ និងសិស្សានុសិស្សទាំងអស់ ដែលបានចូលរួមដាំបន្លែស្រស់ៗប្រកបដោយសុវត្ថិភាព ដើម្បីឱ្យវីរកងទ័ពដែលកំពុងឈរការពារបូរណភាពទឹកដី និងជនភៀសសឹក មានបន្លែសម្រាប់បរិភោគដែលជំនួយដល់សុខភាព។

ជាមួយគ្នានេះ លោកជំទាវបណ្ឌិត ពេជ ចន្ទមុន្នី ក៏បានបង្ហាញនូវការជឿជាក់ថា ចលនានៃការគាំទ្រដល់ វីរយុទ្ធជនកម្ពុជា និងជួយដល់អ្នកភៀសសឹកនេះ នឹងនៅបន្តក្នុងដួងចិត្តរបស់ប្រជាពលរដ្ឋខ្មែរគ្រប់រូប ហើយបន្តសហការគ្នា ដើម្បីកម្ពុជាមានកម្លាំងដ៏ខ្លាំងក្លា ថែរក្សាការពារប្រទេសជាតិ ។

បើតាម​ប្រសាសន៍ ឯកឧត្តម ឃួង ស្រេង អភិបាលរាជធានីភ្នំពេញ នៅក្នុងភូមិសាស្ត្ររាជធានីភ្នំពេញ មានសាលារៀនជាង១៧០កន្លែង បានកំពុង​ចូលរួមក្នុងចលានាដាំបន្លែ សម្រាប់ផ្ដល់ជូនវីរកងទ័ព វីរនគរបាលជាតិ និងប្រជាពលរដ្ឋភៀសឹក ហើយបន្លែដែលប្រមូលបាន នឹងត្រូវនាំទៅផ្ដល់ជូនពួកគាត់ភ្លាមៗ។

នាយកសាលាបឋមសិក្សាភ្នំពេញថ្មី និងនាយកសាលាបឋមសិក្សាគោកបញ្ជាន់ មានប្រសាសន៍ថា បន្ទាប់ពីមានការបំផុសចលនា ដែលផ្ដួចផ្ដើមឡើងដោយលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ក្នុងនាមថ្នាក់ដឹកនាំសាលា លោកបានរួមគ្នាជាមួយលោកគ្រូអ្នកគ្រូ ដឹកនាំសិស្សានុសិស្ស ដាំបន្លែសុវត្ថិភាព ដើម្បីផ្ដល់ជូនវីរកងទ័ព វីរនគរបាលជាតិ និងជនភៀសសឹក ជាមួយនឹងទឹកចិត្តសាមគ្គីជាតិ។

គួរជំរាបដែរថា ចលនាការដាំបន្លែនេះ មិនត្រឹមតែធ្វើនៅតាមសាលារៀន ទូទាំងប្រទេសប៉ុណ្ណោះទេ នៅតាមជំរំភៀសសឹកមួយចំនួន អាជ្ញាធរខេត្តក៏បានបំផុសឱ្យ​មានការដាំបន្លែផងដែរ។ ឯកឧត្តម មាន ចាន់យ៉ាដា អភិបាលខេត្តឧត្តរមានជ័យ ក៏​បាន​ចុះជួយប្រមូលផលបន្លែ​នៅ​ក្នុង​កសិដ្ឋានកសិកម្ម​ជនភៀសសឹក ស្ថិតនៅមណ្ឌលសុវត្ថិភាព​បាត់ផ្តៅ, ឯកឧត្តមមានប្រសាសន៍ថា ការប្រមូលផលបន្លែ​ផ្គត់ផ្គង់ដោយផ្ទាល់ទៅកាន់កងទ័ពជួរមុខ និង​ជនភៀសសឹក គឺបានឆ្លុះបញ្ចាំង​ពីយុទ្ធសាស្រ្ត​គ្រប់គ្រង​គ្រោះអាសន្ន​ដ៏ឆ្លាតវៃ ដោយ​បានផ្លាស់ប្តូរ​ស្ថានភាពពីការ​រង់ចាំ​ជំនួយ មកជាម្ចាស់ការលើខ្លួនឯង ក្នុង​ការធានាយ៉ាងរឹងមាំ​នូវ​ខ្សែ​សង្វាក់ផ្គត់ផ្គង់​ម្ហូបអាហារ៕