កត្តាគាំទ្រពីគ្រួសារ សាលារៀន មិត្តភក្តិ ជំរុញទឹកចិត្តក្រុមយុវជនចូលរួមកម្មវិធីជជែកដេញដោលយុវជនថ្នាក់ជាតិ ២០២៣

កម្មវិធីជជែកដេញដោលយុវជនថ្នាក់ជាតិ​ឆ្នាំ២០២៣ ទើបតែបានរកឃើញម្ចាស់ជ័យលាភីកាលពីថ្ងៃទី១២ ខែសីហា កន្លងទៅនេះ ក្រោយ​ធ្វើការប្រកួតជម្រុះជាច្រើនដំណាក់កាលអស់រយៈពេល​ជាច្រើនខែ ដោយ​ក្នុងនោះ ក្រុមយុវជន​មក​ពី​សាលាមីគីវ៉េ រាជធានីភ្នំពេញ​ បានឈ្នះជ័យលាភី ខណៈយុវជន​មក​ពី​សាលា​បញ្ញាសាស្រ្តអន្តរជាតិ ខេត្តបាត់ដំបង ទទួលបានជ័យលាភីរង។ ក្រុមយុវជន​ជ័យលាភី សុទ្ធសឹងតែបានអះអាងដូចៗគ្នា កត្តាដែលជំរុញ​ឱ្យ​ពួកគេ​ឈាន​បានលទ្ធផលល្អនេះ គឺដោយសារតែកត្តាគ្រួសារ សាលារៀន និង​មិត្តភក្តិ។

យុវតី ហួ លីហ័រ តំណាងក្រុមជ័យលាភី សាលាមីគីវ៉េ និយាយថា កត្តាដែលជំរុញ​ឱ្យ​ក្រុមរបស់ខ្លួនខិតខំប្រឹងប្រែង រហូត​ឈាន​ចូល​មក​ដល់វគ្គផ្តាច់ព្រ័ត្ត និង​ទទួលជោគជ័យ គឺមានដូចជា ឪពុកម្តាយ លោកគ្រូអ្នកគ្រូ និងមនុស្ស​ជំរុញខ្លួន ដែលពួកគាត់តែងតែជំរុញ​ និង​លើកទឹកចិត្តពួកខ្លួនជានិច្ច។

ដោយឡែកយុវជន សុធា សុទស្សី តំណាងក្រុមជ័យលាភីរង មកពីសាលាបញ្ញាសាស្រ្តអន្តរជាតិខេត្តបាត់ដំបង ក៏​បានអះអាងស្រដៀងគ្នាដែរថា កត្តាដែលធ្វើ​ឱ្យ​ពួកគេ​ឈានមកដល់វគ្គផ្តាច់ព្រ័ត្រនេះ គឺដោយសារសមាជិកក្រុមទាំងអស់សហការគ្នាយ៉ាងល្អ លើកទឹកចិត្តគ្នា និងខិតខំប្រឹងប្រែងរួមគ្នា។ ក្នុងនោះ អាណាព្យាបាល និង​លោកគ្រូអ្នកគ្រូ ក៏​ជា​ចំណែក​សំខាន់ផងដែរ។

លោកស្រី ថន ថានីរ័ត្ន ជាម្ដាយរបស់បេក្ខនារី វិសាល ច័ន្ទរតនា ដែលជាសមាជិកម្នាក់មកពីសាលា​បញ្ញាសាស្ត្រអន្តរជាតិខេត្តបាត់ដំបង បានបានលើកឡើងថា លោកស្រីពិតជាមានអារម្មណ៍រំភើប និងសប្បាយចិត្ត ដែលបានឃើញ​កូនបង្ហាញសមត្ថភាពដ៏អស្ចារ្យ ។ ហើយលោកស្រីជឿជាក់ថា ​កត្តាដែលធ្វើ​ឱ្យ​កូនលោកស្រីទទួលបានលទ្ធផលល្អនេះ គឺបានមកពីការជួយបង្ហាត់បង្ហាញរបស់លោកគ្រូអ្នកគ្រូ ។ យ៉ាងណាមិញ លោកស្រី ថានីរ័ត្ន ក៏​តែងតែផ្តល់ពេលវេលាគ្រប់គ្រាន់ និង​ជំរុញទឹកចិត្ត​ពួកគេ។

គាត់រៀនដោយខ្លួនឯង ប៉ុន្តែអ្វីដែលយើងបណ្ដុះគឺ វិន័យ និងគុណធម៌។

លោកស្រី ថន ថានីរ័ត្ន អាណាព្យាបាល យុវតី វិសាល ច័ន្ទរតនា

សម្រាប់លោក សេង សំអាត ឪពុករបស់យុវតី សេង ធីតាវត្តី មកពីក្រុមសាលាមីគីវ៉េ​រាជធានីភ្នំពេញ មានប្រសាសន៍ថា កត្តាដែលធ្វើឱ្យកូនរបស់លោកក្លាយជាយុវជនឆ្នើម រហូតក្លាយជាម្ចាស់ជ័យលាភីកម្មវិធីជជែកដេញដោលថ្នាក់ជាតិ គឺមកពីការខិតខំប្រឹងប្រែង ការគាំទ្រពីមិត្តភក្តិ និងការចូលរួមពីលោកគ្រូអ្នកគ្រូ ។ ក្នុងនោះ​ លោក​ក៏​កោតសរសើរ​ដល់​ការ​ខិតខំប្រឹងប្រែងរបស់កូន ព្រមទាំងការជួយជ្រោមជ្រែងរបស់លោកគ្រូអ្នកគ្រូផងដែរ ខណៈរូបលោកផ្ទាល់មិនសូវមានពេលវេលាច្រើនសម្រាប់កូននោះ។

ខ្ញុំមិនសូវបានណែនាំអ្វិច្រើនទេ ព្រោះរវល់ធ្វើការច្រើន ប៉ុន្តែតែងតែបង្ហាញការគាំទ្រ និងលើកទឹកចិត្តឱ្យកូនប្រឹងប្រែងសិក្សាជានិច្ច។

លោក សេង សំអាត អាណាព្យាបាល យុវតី សេង​ធីតាវត្តី

លោក ស៊ិន ឌីម៉ង់ ជាគ្រូបង្វឹកនៃក្រុមយុវជនមកពីសាលាចំណេះដឹងទូទៅ មីគីវ៉េ បានបង្ហាញអារម្មណ៍ថា​លោកពិតជាសប្បាយរីករាយ ព្រោះលោក និងប្អូនៗ ដែលជាសមាជិកក្រុមធ្វើការជាមួយគ្នា តាំងពីខែ១១ ឆ្នាំ ២០២២ ហើយធ្វើការជាមួយគ្នា ប្រកបដោយភាពស្វិតស្វាយ ហើយទោះជាមានបញ្ហាអ្វីក៏ដោយ ក៏នៅតែបន្តធ្វើការ និងស្រុះស្រួលគ្នា ពិភាក្សាគ្នា រកដំណោះស្រាយរួម។

គួរ​បញ្ជាក់ថា កម្មវិធីជជែកដេញដោលយុវជន​ថ្នាក់ជាតិ ត្រូវ​បានបង្កើត​ឡើង ជាការផ្តល់វេទិកាវោហាកោសល្យ និង​ការ​សម្តែងមតិសម្រាប់យុវជន ដើម្បីបណ្តុះបណ្តាល និង​អភិវឌ្ឍសមត្ថភាព ជំនាញ និង​បំណិន ដូចជា ការ​ស្រាវជ្រាវ ការ​និយាយជា​សាធារណៈ នវានុវត្តន៍ ការផ្តួចផ្តើមគំនិតថ្មីៗ និង​ការដោះស្រាយ​បញ្ហា។ តាមរយៈកម្មវិធីនេះ ក៏​ជា​ការ​បណ្តុះ​នូវ​ស្មារតីវប្បធម៌សន្ទនា ការ​បញ្ចេញមតិប្រកបដោយ​ទំនួលខុសត្រូវ និង​ប្រាស្រ័យទាក់ទងប្រកបដោយសន្តិសហវិជ្ជមានក្នុងចំណោម​យុវជនផងដែរ៕