សមាគមជប៉ុន-កម្ពុជា ជំរុញអ្នកវិនិយោគជប៉ុនជួយអភិវឌ្ឍន៍ធនធានមនុស្សនៅកម្ពុជា

ភ្នំពេញ – សមាគមជប៉ុន-កម្ពុជា (JCA) បានសន្យានឹងទាក់ទាញអ្នកវិនិយោគទុនរបស់ខ្លួនឱ្យបានច្រើនបន្ថែមទៀត ដើម្បីចូលរួមជួយអភិវឌ្ឍន៍វិស័យធនធានមនុស្សរបស់កម្ពុជាឱ្យកាន់តែមានសមត្ថភាព ចំណេះ ជំនាញ ដើរឱ្យទាន់តម្រូវការសង្គម-សេដ្ឋកិច្ចដែលកំពុងរីកចម្រើនទាំងបច្ចុប្បន្ន និងត្រៀមសម្រាប់អនាគត ។ ការគាំទ្រដល់ការអភវឌ្ឍន៍ធនធានមនុស្សនេះ បានធ្វើឡើងនៅក្នុងជំនួបពិភាក្សាការងារមួយរវាងឯកឧត្តមបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងលោក Takahashi Fumiaki ប្រធានសមាគមជប៉ុន-កម្ពុជា (JCA) និងជាអតីតឯកអគ្គរាជទូតជប៉ុនប្រចាំកម្ពុជា នាព្រឹកថ្ងៃទី០៧ ខែកុម្ភៈ ឆ្នាំ២០២៣ នៅទីស្តីការក្រសួងការងារ ។

ឯកឧត្តមបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ លើកឡើងថា រដ្ឋាភិបាលប្រទេសទាំងពីរបានបង្កើនកិច្ចសហប្រតិបត្តិការដល់កម្រិតដៃគូរជាយុទ្ធសាស្ត្រគ្រប់ជ្រុងជ្រោយ ។ ទន្ទឹមគ្នានេះ លំហូរពាណិជ្ជករជប៉ុនបានចូលមកកម្ពុជាកាន់តែច្រើន វិនិយោគលើគ្រប់វិស័យ ព្រមទាំងបានផ្តល់ឱកាសការងារជូនដល់ពលរដ្ឋកម្ពុជាបានយ៉ាងច្រើន ដែលបង្ហាញពីសក្តានុពល និងភាពទាក់ទងរបស់កម្ពុជា ។ វត្តមានរបស់អ្នកវិនិយោគជប៉ុនមកកាន់កម្ពុជាច្រើនជារូបភាពទាក់ទាញអ្នកវិនិយោគប្រទេសដទៃផ្សេងទៀតមកកាន់កម្ពុជាក៏កាន់តែច្រើនបន្ថែមទៀត ។

ឯកឧត្តមរដ្ឋមន្ត្រីក្រសួងការងារ បានបន្តថា ការវិនិយោគរបស់ជប៉ុន ពិតជានាំនូវបច្ចេកវិទ្យាទំនើបថ្មីៗ និងយន្តការគ្រប់គ្រងក្រុមហ៊ុនរោងចក្រ ឱ្យកាន់តែមានភាពងាយស្រួល ។ ឯកឧត្តមបានកត់សម្គាល់ថា ក្រុមហ៊ុនរបស់ជប៉ុនដែលមានវត្តមាននៅកម្ពុជា កម្រមានវិវាទការងារ ហើយដំណើរការក្រុមហ៊ុនអនុវត្តទៅតាមច្បាប់បានល្អ ព្រមទាំងមានទំនាក់ទំនងរវាងនិយោជកជប៉ុន និងកម្មករនិយោជិតកម្ពុជា ។

នាឱកាសនោះដែរ ឯកឧត្តមរដ្ឋមន្ត្រី ចង់ឃើញកម្មសិក្សាការីកម្ពុជា បានទៅធ្វើការនៅប្រទេសជប៉ុនឱ្យបាន ៥ម៉ឺននាក់ ខណៈបច្ចុប្បន្នកម្មសិក្សាការីកម្ពុជាបានចេញទៅធ្វើការនៅជប៉ុនបានត្រឹមប្រមាណ ២ម៉ឺននាក់ប៉ុណ្ណោះ ។ ឆ្លើយតបទៅនឹងសំណូមពររបស់ឯកឧត្តមរដ្ឋមន្ត្រី លោក Takahashi Fumiaki ប្រធានសមាគមជប៉ុន-កម្ពុជា (JCA) បានសន្យាប្រឹងប្រែងធ្វើយ៉ាងណាជួយមកកម្ពុជាលើជំនាញចំាបាច់ និងកំពុងមានតម្រូវការសម្រាប់ទៅធ្វើការនៅជប៉ុន ។

សូមជម្រាបថា ដោយសង្កេតឃើញកម្ពុជាបច្ចុប្បន្នកំពុងប្រើប្រាស់រថយន្តដែលផលិតនៅប្រទេសជប៉ុនមានចំនួនកាន់តែច្រើន ភាគីជប៉ុននឹងផ្តល់ការបណ្តុះបណ្តាលលើជំនាញថែទាំ និងជួសជុលរថយន្តនេះទៅដល់យុវជនកម្ពុជាឱ្យកាន់តែមានសមត្ថភាព រួមនឹងផ្តល់ការបណ្តុះបណ្តាលជំនាញកែសម្ជស្សដែលជាជំនាញមួយកំពុងតែពេញនិយម អាចផ្តល់ចំណូលបានប្រសើរ បើយុវជនយុវតីរបស់កម្ពុជាចាប់យកជាអាជីពឱ្យបានស្ទាត់ជំនាញ ។ ការយកចិត្តទុកដាក់ដល់កម្មសិក្សាការីកម្ពុជាដែលបានទៅធ្វើការនៅជប៉ុន នឹងជួយកម្ពុជាលើជំនាញបណ្តុះបណ្តាលវិជ្ជាជីវៈនេះ ដែលស្របគ្នាទៅនឹងផែនការយុទ្ធសាស្ត្រ ក៏ដូចជាផែនទីបង្ហាញផ្លូវរបស់កម្ពុជាឆ្នាំ២០៣៥ ៕