ជំនាញសេវាកម្មសម្អាងកាយ ជួយយុវតី ស៊ាត ដាវ មានជំនាញ និងរកចំណូលជួយឪពុកម្ដាយនៅស្រុកកំណើត

ជំនាញសេវាកម្មសម្អាងកាយជាជំនាញដែលកំពុងមានទីផ្សារ និងជាជំនាញមួយដែលកំពុងផ្ដល់ការសិក្សាវគ្គខ្លីពីរាជរដ្ឋាភិបាលក្រោមគម្រោង១លាន៥សែន របស់ក្រសួងការងារ និង​បណ្ដុះបណ្ដាលវិជ្ជាជីវៈ ដែលផ្ដល់ការសិក្សានៅតាមមជ្ឈមណ្ឌលបណ្ដុះបណ្ដាលវិជ្ជាជីវៈតាមបណ្ដាខេត្តក្រុងនានានៅទូទាំង​ប្រទេស។

យុវតី ស៊ាត ដាវ ជាសិក្ខាកាមកំពុងសិក្សាជំនាញសេវាកម្មសំអាងកាយនៅមជ្ឈមណ្ឌលបណ្ដុះបណ្ដាលវិជ្ចាជីវៈខេត្តកែប និងជាបុគ្គលិកហាត់ការនៅក្នុងហាងផាត់មុខធ្វើសក់មួយកន្លែងដែលជាដៃគូសហការណ៍ជាមួយមជ្ឈមណ្ឌលបណ្ដុះបណ្ដាលវិជ្ជាជីវៈខេត្តកែប។ ដាវ ជាកូនស្រីច្បងក្នុងគ្រួសារដែលមានប្អូនៗចំនួនប្រាំពីរនាក់ទៀតក្នុងបន្ទុករបស់ឪពុកម្ដាយ, ព្រោះតែបញ្ហាជីវភាព​ ដាវ សម្រេចចិត្តឈប់រៀនត្រឹមថ្នាក់ទី៩ និងស្វែងរកការងារដើម្បីជួយសម្រួលកម្លាំងឪពុកម្ដាយ។

ជាកូនអ្នកខេត្តបាត់ដំបង ប៉ុន្តែ ដាវ បានសម្រេចចិត្តរៀនជំនាញសេវាកម្មសំអាងកាយ នៅខេត្តកែបដោយសារមានកត្តាជាច្រើនគួបផ្សំគ្នា។ កត្តាទាំងនោះរួមមាន បានឃើញអំពីព័ត៌មាននៃការផ្សព្វផ្សាយជាញឹកញាប់របស់ TVET ខេត្តកែប​ និងបានស្គាល់អ្នកគ្រូបង្រៀនជំនាញនេះតាមរយៈសាច់ញាតិរបស់ ដាវ ដូចនេះទើប ដាវ សម្រេចចិត្តសុំឪពុកម្ដាយមក​សិក្សានៅខេត្តកែប។

សម្រេចចិត្តជ្រើសរើសរៀនជំនាញសំអាងកាយនេះ ក៏មានមតិលើកឡើងថា មិនគួររៀនជំនាញនេះទេព្រោះមានទីផ្សារចង្អៀត មានគេបើកហាងសាឡនច្រើន ប៉ុន្តែមិនបានបញ្ឈប់ចំណង់សិក្សារបស់ ដាវ ឡើយ ព្រោះនាងបានគិតថា នៅពេលដែលមានជំនាញ នឹងអាចជួយឱ្យខ្លួនមានការងារមួយច្បាស់លាស់ និងអាចរកចំណូលជួយគ្រួសារបាន ម្យ៉ាងជំនាញសំអាងកាយ គឺជាជំនាញដែលខ្លួនស្រលាញ់ផងដែរ។

យុវតី ស៊ាត ដាវ បានបន្តថា ជំនាញសម្អាងកាយវគ្គបួនខែនេះ សិក្សាអំពី ការម៉ាស្សាមុខ ផាត់មុខធ្វើសក់ កាត់សក់បុរសនារី ធ្វើក្រចកជាដើម។ ហើយជំនាញនេះបានផ្លាស់ប្ដូរការគិត និងជីវិតរបស់ ដាវ ឱ្យមានជំនាញច្បាស់លាស់ និងមានការងារធ្វើ ដោយបច្ចុប្បន្ន ដាវ ក៏កំពុងធ្វើការនៅហាងសាឡនមួយកន្លែងផងដែរ។

សម្រាប់ទស្សនៈផ្ទាល់ខ្លួន យុវតី ស៊ាត ដាវ យល់ឃើញថា ជំនាញនេះមានសារសំខាន់សម្រាប់ខ្លួនឯង និងសម្រាប់មនុស្សគ្រប់រូបផងដែរព្រោះអាចធ្វើឱ្យភ្ញៀវមានភាពស្រស់ស្អាត តែងខ្លួនស្អាតៗ និងបានផ្ដល់ចំណូលសម្រាប់ខ្លួនឯង។

ជាមួយគ្នានេះ ដាវ បានលើកទឹកចិត្ត​ដល់ យុវជន យុវនារីដែលមិនមានលទ្ធភាពបន្តការសិក្សា ហើយ​មានចំណូលចិត្តចង់រៀនជំនាញណាមួយ អាចទៅរកព័ត៌មានបន្ថែម និងចុះឈ្មោះសិក្សានៅតាមមជ្ឈមណ្ឌលបណ្ដុះបណ្ដាលវិជ្ជាជីវៈតាមបណ្ដាខេត្តដែលកំពុងស្នាក់នៅទូទាំងប្រទេសកម្ពុជាដោយឥតគិតថ្លៃ៕